Driton Ajazi paralajmëron padi ndaj “Gazetës NewBorn”: Po shpifë me qëllim të na përçaj!

Kandidati për kryetar të komunës së Drenasit, nga Demokratët për Drenasin, Driton Ajazi ka reaguar ndaj “Gazetës NewBorn”, në lidhje me publikimin e disa emrave që gjëja do të jenë në listën e kabinetit të kryetarit.

Ajazi në facebook ka shkruar se ky lajmi është shpifje, ndërsa thotë se qëllim ka të përçajë dhe dezinformojë për njerëzit që janë hisedarë të mëdhenjë të këtij ndryshimi.

Ai ka thënë se kundër këtij portali do të inicohet rast në Këshillin e Mediave të Shkruara dhe në Gjykatën kompetente.

REAGIM

Pushteti që po shëmbet i ka aktivizuar edhe portalet shpifëse, në kuadër të shumë metodave të ndyra, me të cilat po na lufton në betejën për Drenasin.

Portali i quajtur “Gazeta NewBorn”, po e mban në ballinë shpifjen me emrat e nënkryetarit dhe drejtorëve që do t’i kem në mandatin, të cilin do ta fitojmë këtë të diele. Shpif për emrat dhe shpif për të kaluarën politike të njerëzve që i apostrofon, duke shkruar se “të gjithë kanë dështuar të fitojnë në bastionin e PDK-së”.

Kundër portalit shpifës do të iniciojmë rast në Këshillin e Mediave të Shkruara dhe në Gjykatën kompetente.

Sepse, qëllimi i këtij lajmi të rremë është të na përçajë e të dezinformojë për njerëzit që janë hisedarë të mëdhenj të këtij ndryshimi të madh që po i ndodh Drenasit.

Janë hisedarë në ndryshim, por këtë kontribut të pakursyer që po e jep secili, nuk po e bën as për poste e as për përfitime tjera. Po e bën për Drenasin. Sepse, mentaliteti ynë nuk është mentalitet pazarxhish. Ne do ta luftojmë atë mentalitet që kryetari në ikje e instaloi në Komunë.

Deri sot nuk kam folur mbi kabinetin tim.

Do të jetë kabinet i njerëzve me vlera e profesionistë. Kabinet që reflekton gjithëpërfshirjen. Kabinet që do ta implementojë Programin tonë Zhvillimor dhe do ta transformojë Drenasin.

Nuk ka as lajm të rremë dhe asgjë tjetër që e ndalë dëshirën, entuziazmin e mobilizimin e pashembullt për ndryshim.