Është i pari nga 2,500 pjesëtarët aktualë që ka Forca e Sigurisë së Kosovës, që ka provuar ndjenjën e të pilotuarit një fluturake. Dhe, rrjedhimisht, Afrim Zabeli është piloti i parë i Ushtrisë së Kosovës. Por krahas ushtrisë, Zabeli ka një histori të dhimbshme.
Në luftën e fundit në Kosovë, në masakrën e Rezallës, Afrimi humbi disa familjarë.
E sot janë mbushur plotë 23 vjet nga masakra në Rezallë të Skenderajt, ku nga ushtria dhe policia serbe u ekzekutuan 98 shqiptarë, banorë të Rezallës dhe fshatrave përreth, nga të cilët 44 ishin munduar t’i zhdukin.
Një pjesë e trupave u gjenden në Rudnicë të Rashkës dhe iu dorëzuan familjarëve.
Më 5 prill të vitit 1999 serbët rrethuan shtëpitë e këtyre familjeve dhe pushkatuan pothuajse të gjithë burrat dhe djemtë e rinj.
Nga masakra në Rezallës vetëm tre kanë shpëtuar të gjallë. Kjo masakër konsiderohet si një ndër masakrat më të pamëshirshme gjatë luftës në Kosovë.
Me rastin e 23-vjetorit të kësaj masakre, kryeministri Albin Kurti do të bëjë sot homazhe në Rezallë.
