Prokuroria Speciale e Republikës së Kosovës ka reaguar pas akuzave nga Ministria e Drejtësisë dhe ministri i Punëve të Brendshme, Xhelal Sveçla, lidhur me publikimin e raportit shtesë të ekspertizës të institutit zviceran për vdekjen e ish-aktivistit të Lëvizjes Vetëvendosje, Astrit Dehari, dhe ka publikuar të gjitha konkluzionet.
Përmes një komunikate për medie, PSRK deklaron se nuk ka komentuar raportin, por vetëm kanë publikuar konkluzionet e raportit të ekspertizës së Institutit të Mjekësisë Ligjore në Lozanë të Zvicrës lidhur me rastin e Deharit, raporton Gazeta Sinjali.
PSRK i përgjigjet akuzave për manipulim me prova, duke thënë se vetëm nuk është prezantuar mendimi dhe konstatimi i ekspertëve të Institutit zviceran.
“Prokuroria Speciale siguron opinionin se në asnjë mënyrë nuk ka manipuluar me prova, por vetëm se ka prezantuar mendimin dhe konstatimin e ekspertëve të Institutit të Mjekësisë Ligjore të Lozanës në Zvicërr. Andaj, pretendimet tendencioze dhe dashakeqe të Ministres së Drejtësisë, karshi Prokurorisë Speciale janë të paqëndrueshme si dhe kanë për qëllim dezinformimin dhe manipulimin e opinionit publik”, thuhet në komunikatë.
PSRK bën thirrje që kushdo që ka dyshim mbi këto përfundime, le t’i drejtohet Institutit të Mjekësisë Ligjore të Lozanës për informacione shtesë.
Po ashtu ndaj akuzave për ndikim në këtë rast, PRSK pohon se rastin do ta trajtojë në mënyrë të pavarur dhe profesionale deri në zbardhjen e plotë.
“Prokuroria Speciale e Republikës së Kosovës, siguron qytetarët se me seriozitet do ta trajtoj rastin në mënyrë të pavarur dhe profesionale deri në zbardhjen e plotë të rastit Dehari. Po ashtu, i sigurojmë opinionin se Prokuroria Speciale në asnjë mënyrë nuk do të ndikohet nga askush që pretendon të ndërhyj në këtë rast. Çfarëdo iniciative për të goditur institucionet e pavarura të drejtësisë është jo e drejtë dhe ka për qëllim që të ulë besimin e qytetarëve në institucionin e Prokurorit të Shtetit“, thuhet tutje në komunikatë.
Prokuroria Speciale ka publikuar konkluzionet në tërësi të Institutit të Mjekësisë Ligjore në Lozanë të Zvicrrës.
Ky reagim erdhi pas akuzave të bëra nga Ministria e Drejtësisë dhe ajo e Punëve të Brendshme, të cilat e akuzuan Prokurorinë Speciale se ka publikuar vetëm 2 nga 5 konkluzionet e Institutit zviceran.
MD akuzoi Prokurorinë Speciale të Kosovës për propagandë të rezultatit, duke thënë se kjo dëshmon mangësi të theksuar intelektuale, mungesë të njohurive shkencore, gjuhë jo profesionale dhe qëllim dashakeq.
Po ashtu ministri i Brendshëm, Xhelal Sveçla, shtoi se ky rast duhet të hetohet me profesionalizëm dhe pa asnjë ndikim dhe tha se do të angazhohet brenda kompetencave që ka që të kontribuojë pa kursim në sjelljen e drejtësisë për Deharin.
Ndryshe Instituti i Mjekësisë Ligjore në Lozanë të Zvicrës ka konstatuar se objektet që u gjetën afër Astrit Deharit në momentin e vdekjes kanë përmbajtur vetëm profil të ADN-së së tij.
Bëhet fjalë për një brisk rroje, një stilolaps të lidhur me një lidhëse këpucësh dhe një pjesë metali.
Bazuar në të gjeturat e këtij raporti, Prokuroria Speciale njoftoi se do të vazhdojë me hetimin e këtij rasti dhe do t’i ndërmarrë të gjitha veprimet e nevojshme.
Astrit Dehari u gjet i vdekur më 5 nëntor të vitit 2016 në qelinë e tij në Qendrën e Paraburgimit në Prizren ku po mbahej si i dyshuar për sulmin ndaj ndërtesës së Kuvendit, në gusht të vitit 2016.
